ଦେଶ ସମ୍ବିଧାନର ପ୍ରତୀକ ‘ଅଶୋକ ସ୍ତମ୍ଭ’ର କାରୁକାର୍ଯ୍ୟ ଓ ନିର୍ମାଣ ଶୈଳୀକୁ ନେଇ ବେଶ୍‌ ଚର୍ଚ୍ଚାରେ ରହିଛନ୍ତି ବ୍ରହ୍ମପୁରର ଶିଳ୍ପୀ ରାଜକୁମାର ବେହେରା । ରାଜକୁମାର ନିର୍ମାଣ କରୁଥିବା ଅଶୋକ ସ୍ତମ୍ଭ ଗଞ୍ଜାମ ଜିଲ୍ଲାର ଗୋଳାବନ୍ଧଠାରେ ସ୍ଥାପନ କରାଯିବ । ଏହାର ଉଚ୍ଚତା ହେଉଛି ୧୩ଫୁଟ । ନୂଆଦିଲ୍ଲୀସ୍ଥିତ ନୂତନ ସଂସଦ ଭବନ ପରିସରରେ ୨୧ ଫୁଟ ଉଚ୍ଚତା ବିଶିଷ୍ଟ ଦେଶର ସର୍ବବୃହତ୍‌ ଅଶୋକ ସ୍ତମ୍ଭ ସ୍ଥାପିତ ହୋଇଥିବା ବେଳେ ଏହାକୁ ଦ୍ବିତୀୟ ବୃହତ୍‌ ବୋଲି କହିଛନ୍ତି ସେ । ୮ଶହ କିଲୋ ଓଜନର ଗ୍ଲାସ୍‌ ଫାଇବର୍‌ରେ ଏହି ଅଶୋକ ସ୍ତମ୍ଭକୁ ନିର୍ମାଣ କରାଯାଇଥିବା ବେଳେ ବ୍ରୋଞ୍ଜ୍‌ ରଙ୍ଗରେ ରଙ୍ଗିନ କରାଯାଇଛି । ଏହି ନିର୍ମାଣ ପାଇଁ ସମୁଦାୟ ୪୦ଦିନ ଲାଗିଛି ଏବଂ ଏଥିପାଇଁ ସମୁଦାୟ ୩ ଲକ୍ଷ ଟଙ୍କା ଖର୍ଚ୍ଚ ହୋଇଛି । ନିର୍ମାଣ କାର୍ଯ୍ୟ ପ୍ରାୟତଃ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ଆଗାମୀ ଦିନରେ ରାଷ୍ଟ୍ରପତିଙ୍କ କରକମଳରେ ଏହାକୁ ଲୋକାର୍ପିତ କରିବା ନେଇ ପ୍ରତିରକ୍ଷା ବିଭାଗ ପକ୍ଷରୁ ଯୋଜନା ରହିଥିବା ବୋଲି ଶିଳ୍ପୀ ରାଜକୁମାର ସୂଚନା ଦେଇଛନ୍ତି । ଉଲ୍ଲେଖଯୋଗ୍ୟ ଯେ ବିଭିନ୍ନ ସମୟରେ ଗ୍ଲାସ୍‌ ଫାଇବରରେ ବିଭିନ୍ନ କାରୁକାର୍ଯ୍ୟ କରି ବେଶ୍‌ ସୁନାମ ଅର୍ଜନ କରିଛନ୍ତି ଶିଳ୍ପୀ ରାଜକୁମାର। ଏହାପୂର୍ବରୁ ସେ ରାଜ୍ୟର ସର୍ବବୃହତ୍‌ ୩୦ଫୁଟ ଉଚ୍ଚତା ବିଶିଷ୍ଟ ଶିବମୂର୍ତ୍ତି ରାମଲିଙ୍ଗମ୍‌ ପାର୍କରେ ସ୍ଥାପନ କରି ଚର୍ଚ୍ଚାକୁ ଆସିଥିଲେ।