ଦିଲ୍ଲୀର ଭାରତୀୟ ଜନ ସଂଚାର ସଂସ୍ଥାନରେ କେନ୍ଦ୍ର ମନ୍ତ୍ରୀଙ୍କ ଦ୍ୱାରା ଉଦଘାଟିତ ହୋଇଥିବା ଦୁଇ ଦିନିଆ ଆଞ୍ଚଳିକ କମ୍ୟୁନିଟି ରେଡିଓ ସମ୍ମେଳନ (ଉତ୍ତର)ର ଅନୁଷ୍ଠିତ ହୋଇଛି ଉଦଘାଟନୀ ଅଧିବେଶନ। ଏଥିରେ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ୮ମ ଏବଂ ୯ମ ଜାତୀୟ କମ୍ୟୁନିଟି ରେଡିଓ ପୁରସ୍କାର ପ୍ରଦାନ କରିଛନ୍ତି । ଏଥିରେ ଓଡ଼ିଶାର ୩ କମ୍ୟୁନିଟି ରେଡିଓ ଷ୍ଟେସନକୁ ମିଳିଛି ଜାତୀୟ ପୁରସ୍କାର। ଥିମେଟିକ୍ ପୁରସ୍କାର ବର୍ଗ‌ରେ ଓଡ଼ିଶା ସମ୍ବଲପୁରର ରେଡିଓ ହୀରାଖଣ୍ଡ ଦ୍ୱିତୀୟ ପୁରସ୍କାର ପାଇଥିବା ବେଳେ; ସ୍ଥାନୀୟ ସଂସ୍କୃତି ପ୍ରୋତ୍ସାହିତ କରିବା ପାଇଁ ଭୁବନେଶ୍ୱରର ଭଏସ୍ ଅଫ୍ ସୋଆକୁ ମିଳିଛି ପ୍ରଥମ ପୁରସ୍କାର; ଏଥିସହ ସ୍ଥିରତା ମଡେଲ ପୁରସ୍କାର ବର୍ଗରେ ପ୍ରଥମ ପୁରସ୍କାର ହାତେଇଛି ରେଡିଓ ହୀରାଖଣ୍ଡ, ସମ୍ବଲପୁର। ଏହି ଅବସରରେ ସମାବେଶକୁ ସମ୍ବୋଧିତ କରି ମନ୍ତ୍ରୀ କହିଛନ୍ତି ଯେ “ଜନ ଭାଗିଦାରୀ ସେ ଜନ ଆନ୍ଦୋଳନ” କୁ ହାସଲ କରିବାରେ କମ୍ୟୁନିଟି ରେଡିଓ ଷ୍ଟେସନ୍ ପ୍ରମୁଖ ଭୂମିକା ଗ୍ରହଣ କରିଥାଏ। ଏହି ଷ୍ଟେସନଗୁଡିକ ଆକାଶବାଣୀର ଉଦ୍ୟମକୁ ପ୍ରଶଂସା କରନ୍ତି ଏବଂ ବିପଦ ସମୟରେ ସେମାନଙ୍କ ଶ୍ରୋତାମାନଙ୍କୁ ସୂଚନା ପ୍ରଦାନ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିଛନ୍ତି। ପୁରସ୍କାର ଷ୍ଟେସନଗୁଡିକୁ ଉତ୍ସାହିତ କରୁଥିବାବେଳେ ମନ୍ତ୍ରୀ କହିଛନ୍ତି ଯେ ସେମାନେ ଭାରତର ଦୂର ଦୂରାନ୍ତର କୋଣ ଅନୁକୋଣରେ ଶିକ୍ଷା, ସଚେତନତା ସୃଷ୍ଟି ଏବଂ ସମସ୍ୟାର ସମାଧାନରେ କମ୍ୟୁନିଟି ରେଡିଓର ଗୁରୁତ୍ୱକୁ ମଧ୍ୟ ସ୍ୱୀକାର କରିଛନ୍ତି।

କମ୍ୟୁନିଟି ରେଡିଓ ଗୋଷ୍ଠିକୁ ସ୍ୱାସ୍ଥ୍ୟ, ପୁଷ୍ଟିକର ଖାଦ୍ୟ, ଶିକ୍ଷା, କୃଷି ଇତ୍ୟାଦି ପ୍ରସଙ୍ଗରେ ସ୍ଥାନୀୟ କଥା ପ୍ରସାରଣ ପାଇଁ ଏକ ପ୍ଲାଟଫର୍ମ ଯୋଗାଇଥାଏ । ଗତ କିଛି ବର୍ଷ ମଧ୍ୟରେ କମ୍ୟୁନିଟି ରେଡିଓ ଷ୍ଟେସନଗୁଡିକର ଅଭିବୃଦ୍ଧି ଘଟିଛି । ଆଜି ପର୍ଯ୍ୟନ୍ତ, ଦେଶରେ ସମୁଦାୟ ୪୪୯ କମ୍ୟୁନିଟି ରେଡିଓ ଷ୍ଟେସନ୍ ଅଛି, ସେଥିମଧ୍ୟରୁ ୭୦% ଗ୍ରାମାଞ୍ଚଳରେ ଅଛି । କମ୍ୟୁନିଟି ରେଡିଓ ଷ୍ଟେସନ୍ ପ୍ରତିଷ୍ଠା ପାଇଁ ପ୍ରାୟ ୧୦୦ ଟି ସଂଗଠନକୁ ଅନୁମତି ଦିଆଯାଇଛି। ତେବେ ଜାତୀୟ କମ୍ୟୁନିଟି ରେଡିଓ ପୁରସ୍କାର ଯଥାକ୍ରମେ ୧ମ, ୨ୟ ଏବଂ ୩ୟ ଭାବେ ପ୍ରଦାନ କରାଯାଉଛି ଏବଂ ଏ ବାବଦରେ ୧ ଲକ୍ଷ, ୭୫,୦୦୦ ଏବଂ ୫୦,୦୦୦ ଟଙ୍କା ପୁରସ୍କାର ରାଶି ଦିଆଯାଉଛି ।