‘ଗୁରୁ ପଙ୍କଜ ଚରଣ ଓଡ଼ିଶୀ ଗବେଷଣା ପ୍ରତିଷ୍ଠାନ’ ପକ୍ଷରୁ ଆସନ୍ତା ୧୭ରୁ ୧୯ ତାରିଖ ଯାଏ ‘୨୯ତମ ଗୁରୁ ପଙ୍କଜ ଉତ୍ସବ ଓ ମାହାରୀ ସମ୍ମାନ’ ପ୍ରଦାନ ଉତ୍ସବ ରବୀନ୍ଦ୍ର ମଣ୍ଡପରେ ଅନୁଷ୍ଠିତ ହେବ। ଏହି ଅବସରରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଓ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ରର ମିଳିତ ଆନୁକୂଲ୍ୟରେ ଆଦିଗୁରୁଙ୍କର ୧୦୪ତମ ଜୟନ୍ତୀ ପାଳିତ ହେବ। ଚଳିତବର୍ଷ ସମ୍ମାନଜନକ ‘ମାହାରୀ ସମ୍ମାନ’ ମୋହିନୀଆଟମ୍ ନୃତ୍ୟଶିଳ୍ପୀ ଗୋପିକା ବର୍ମାଙ୍କୁ ପ୍ରଦାନ କରାଯିବ। ସମ୍ମାନ ବାବଦକୁ ୫୦ହଜାର ଟଙ୍କାର ଅର୍ଥରାଶି ସହ ମାନପତ୍ର ଓ ଫଳକ ପ୍ରଦାନ କରାଯିବ। ଏଥିସହ ପ୍ରଥମ ଦିନରେ ଶ୍ରୀମନ୍ଦିରରେ ପ୍ରଚଳିତ ନୃତ୍ୟ, ସଙ୍ଗୀତ, ବାଦ୍ୟ, ସେବକ ସେବିକା ଯଥା- ମାଦେଳୀ, ବୀଣାକାର, ଗାଉଣା ଓ ନାଚୁଣୀ ସମ୍ପ୍ରଦା ନିଯୋଗଙ୍କ ସ୍ମୃତି ଓ ଅବଦାନକୁ ସମ୍ମାନ ଜଣାଇ ଓଡ଼ିଶୀ ନୃତ୍ୟ, ସଙ୍ଗୀତ ଓ ବାଦ୍ୟକ୍ଷେତ୍ରରେ ପ୍ରତିଷ୍ଠିତ ଲାଭ କରିଥିବା ଓ ଜୀବନବ୍ୟାପୀ ସାଧନାରତ ବିଶେଷ ଅବଦାନ ରଖିଥିବା ୪ଜଶ ଶିଳ୍ପୀଙ୍କୁ ସମ୍ମାନିତ କରାଯିବ। ଏଥିପାଇଁ ବେହେଲା ବାଦକ ଗୁରୁ ରମେଶ ଚନ୍ଦ୍ର ଦାସଙ୍କୁ ‘ବୀଣାକାର’, ମର୍ଦ୍ଦଳ ବାଦକ ଗୁରୁ ଶରତଚନ୍ଦ୍ର ରଥଙ୍କୁ ‘ମାଦେଳୀ’, ନୃତ୍ୟଶିଳ୍ପୀ ସିକ୍‌ତା ଦାସଙ୍କୁ ‘ନାଚୁଣୀ ସମ୍ପ୍ରଦା’ ଓ କଣ୍ଠଶିଳ୍ପୀ ନିମାକାନ୍ତ ରାଉତରାୟଙ୍କୁ ‘ଗାଉଣୀ ସମ୍ପ୍ରଦା’ ଉପାଧିରେ ସମ୍ମାନିତ କରାଯିବ। ଏଥିରେ ବିଭିନ୍ନ ପ୍ରାନ୍ତର ଓ ଓଡ଼ିଶାର ବହୁ ଉଦୀୟମାନ ଓ ପ୍ରତିଷ୍ଠିତ ଏକକ ନୃତ୍ୟ ଶିଳ୍ପୀମାନେ ଭାଗ ନେବେ। ଏହି ଅବସରରେ ଆଦି ଗୁରୁ ପଙ୍କଜ ଚରଣ ଦାସଙ୍କ ଦ୍ୱାରା ସଂଯୋଜିତ ନୃତ୍ୟମାନ ପରିବେଷିତ ହେବ ବୋଲି ଅନୁଷ୍ଠାନ ପକ୍ଷରୁ ସୂଚନା ମିଳିଛି।